28 Мар 2009 | Джемиет
Шу мевзуда март 20-23 куньлери Таврия миллий университетинде кечирильген IV халкъара ильмий-амелий конференция бу сефер тюркшынаслыкъ ве шаркъшынаслыкъ илиминде буюк итибар къазангъан, къырымтатар тильшынаслыгъы боюнджа биринджи илим докторы, профессор Айдер Меметовнынъ 65 йыллыгъына багъышланды.
Конференция арфесинде алим юксек девлет мукяфаты - Ватан огюнде хызметлери ичюн учюнджи дереджели орденнен такъдирленген эди. Конференцияны ачкъан ТМУ ильмий ишлер боюнджа ректор муавини, физика-математика илимлери докторы, профессоры В. Бержанский юбилярнынъ ве умумен бу сене ачылгъанынынъ 90 йыллыгъыны къайд этеджек шаркъшынаслыкъ факультетининъ фаалиети акъкъында икяе этип, кеченлерде тюрк тили боюнджа олимпиадада гъалип чыкъкъан студентлерге ярлыкъларны такъдим этти.
Алимни Татаристан, Къазахистан, Русие ве Киевдеки зенаатдашлары, бунынъ киби де КъМПУ коллективи самимий хайырладылар. ТМУ къырымтатар тильшынаслыгъы кафедрасынынъ доценти Л. Алиева ве шу кафедра докторанты, доцент, филология илимлери намзети Л. Оказ профессор Айдер Меметовнынъ аятий ве ильмий ёлу акъкъында маруза яптылар. Профессорнынъ кендиси исе озь чыкъышында ТМУнинъ къырымтатар тасили системиндеки ролюни айдынлатты.
Миллий арекет ветераны С. Меметов алимнинъ миллий арекетке къошкъан иссеси акъкъында айтты. Пленар меджлистен сонъ конференция ишини «Къырымтатар тильшынаслыгъы», «Къырымтатар эдебиятшынаслыгъы», «Миллий тиллер ве оларнынъ озьара алякъалары», «Тиллерни огретювге культурологик янашув: тюрк ве шаркъ тиллери ве эдебиятыны огретюв усуллары», «Тюркий ве шаркъий девлетлернинъ тарихы ве этнологиясы, тили ве медениети», «Тюркий ве шаркъий тиллернинъ тарихы ве бугуньки вазиети», «Тюркий ве шаркъий тиллер ве эдебиятлар» киби секциялар боюнджа девам этти.
Конференцияда гъает меракълы ве мундериджели чыкъышлар япылып, тюркшынаслыкъ ве шаркъшынаслыкънынъ бугуньде-бугунь тургъан актуаль меселелери музакере этильди.
Зера БЕКИРОВА
Фикирлер →
Фикирлеринизи языныз