28 Мар 2009 | Медениет ве санат
2001 сенеси март айында Крым каналында косьтерилип башлангъан «El-ele» музыкалы-эглендириджи программасы сейирджилернинъ севгисини къазанып, онынъ бир чокъ мухлислери пейда олды. Языкъ ки, о вакъыт программанынъ омюри факъат бир йыл сюрди. Амма кеченде яхшы хабер алдыкъ - бу программа янъыдан чыкъаджакъ экен. Иште, бу акъта «El-ele» программасынынъ муэллифи Нуреддин Незир икяе этмесини риджа эттик.
- Бу программа насыл мейдангъа кельди? Бойле гъае кимден чыкъты?
- Менден эр вакъыт: «Бу программаны яраткъанда бойле гъаени кимден алдынъ?», - деп сорайлар. Кимседен! Умумен мен асылында тюрким, яни бабам ахыскъалы, анам судакълы. Бельки, олар мен четэльде булунып, анда бойле программаны корьгендирим, деп тюшюнедирлер. Чюнки Тюркиеден алгъандырсынъ, деп сорагъанлар да олды. Амма мен телевизорда насыл программаны корьмеге истейим, миллетке энъ файдалы программа ангиси олур, деп озь-озюмден сорадым. Бойледже, бу программаны озюм яраттым.
- Я не ичюн онынъ косьтерилюви токъталды?
- Маддий тарафтан ярдым кесильди. О вакъыт программа ТИКАнынъ ярдымынен чыкъкъан эди. Шимди де спонсорларгъа мухтаджмыз. Оларны 80633851982 телефон номери вастасынен бизнен багъланмаларыны риджа этем.
- «El-ele» янъыдан косьтерилип башланмасынынъ себепчиси ким я да не?
- Халкъ, халкъ ве даа бир кере - халкъ. Программаны халкъ бегенип бакъкъан эди ве оны унутмады.
- О вакъыт бир йыл ичинде къач программа япылды?
- План боюнджа 100 программа азырлайджакъ эдик. Амма бундан тек 20 программаны япып олдыкъ. Программанынъ лейхасында яйынлар ким иле, не вакъыт япыладжагъы, насыл мевзуда оладжагъы - эписи язылгъан.
- Шимди АТR телеканалында «El-ele»нинъ эски программаларынынъ текрары косьтериле. Я янъысы не вакъыт чыкъаджакъ?
- Эски программаларнынъ текрары биткен сонъ, янъысыны косьтереджекмиз. Янъысы да тахминен бир я да бир ярым айдан сонъ косьтерильмеси козьде тутула. Шимди онъа азырланув кете. Эльбет де, маддий тарафтан бизге бираз къыйынджа ола, амма иншалла, программа эписи бир чыкъаджакъ. Бу программа миллетимизнинъ аятынен багълы чешит мевзуларда оладжакъ. Программа шоу-программа шекилинде дегиль де, джанлы бир субет шекилинде олмалыдыр. Мында къараман студиягъа, янъы муитке алышмакъ керек ки, онынъ сербест ве раат, эеджанланмайып лаф этмеси козьде тутула.
- Янъы «El-ele»нинъ биринджи яйынына ким давет этиледжек?
- Бу даа белли дегиль. Амма менимдже, эски «El-ele»де иштирак эткен бутюн мусафирлер топланаджакъ. Чюнки олар манъа пек якъын инсанлар. Келеджекте программагъа 7 яштан 70 яшына къадар адамлар давет этиледжек. Яни юре бильген баладан башлап, юре бильген къарткъа къадар адамлар мында иштирак этеджеклер.
- Программаны ким алып бараджакъ?
- Шимди мен озюм алып бараджам.
- Янъы «El-ele» эски «El-ele»ден ненен фаркъланаджакъ?
- О вакъыт программа насыл олгъан олса, ойле де олур. Джезвелер къоюлыр, адамлар топланырлар. Бельки, телефон вастасы иле къонушма да япармыз. Чалгъы такъымлары давет этиледжек. Келеджекте программаны садедже студияда дегиль де, ачыкъ авада, гузель манзаралы ерде алып бармакъ планлаштырыла. Эминим, программа эвелькиси киби, ойле де танылыр ве халкъ севгисини къазаныр. Иншалла…
Фурсаттан файдаланып, къырымтатар тилининъ сакълап къалынмасы ичюн федакяране чалышкъан «Янъы дюнья» газетасынынъ хадимлерине озь тешеккюримни бильдирем.
Эльмара МУСТАФАЕВА субетлешти
Фикирлер →
Фикирлеринизи языныз