28 Мар 2009 | Эдебият
Студентлер языджы Нузет Умеровнен корюштилер
Март 18-де Таврия миллий университетитинъ къырымтатар ве шаркъ филологиясы факультетинде земаневий назик лирик ве несирджи Нузет Умеровнен корюшюв тешкиль этильди. Къырымтатар эдебияты кафедрасынынъ Планы муджиби кечирильген бу тедбирни айны шу кафедраныръ мудири доцент Шевкет Юнусов ачты ве алып барды.
Шаир озюнинъ лирикасы ве терджимелеринден мисаллер кетирип, яш филологларнынъ эдебий сёзюмизге мерагъыны арттырды, чюнки окъулгъан аман-аман эр бир шииринден сонъ самимий эльчырпмалар янъгъырады. Сёз келими, факультетнинъ мусафири бала шиириети узеринде токъталып, онынъ тизилиши, муайен бир структурасы, мевзулары акъкъында фикир юрсетип, кене де озь иджадындан мисаллер кетирди. Айны бу корюшювде Нузет Умеровнынъ бедиий эсерлери ве терджимелеринден ибарет олгъан китаплары такъдим этильди.
Бу инсаннынъ эдебиятымыз ичюн къыймети шунда ки, о, озь вакътында М. Горький адына эдебият институтыны битирген, атта Белла Ахмадулина, Олжас Сулейменов, Роберт Рождественский киби шахысларнен берабер окъугъан. Бу исе Нузет Умеров лирикасынынъ кямиллигине тесир эткендир. Экинджи тарафтан исе, о, Шамиль Алядин, Юсуф Болат, Раим Тынчеров, Решид Мурад киби акъсакъал иджаткярларымызнынъ тесирини таткъан. Иште, бу корюшювни керчеклештирмектен макъсад - илериде къырымтатар тили ве эдебияты мутехассысы оладжакъ студентлерге джанлы субет кечирмек ве бугуньки эдебиятымызнынъ айры шахыслар эсабына кучюни косьтермектир.
Тедбирнинъ сонъунда талебелер Нузет эфендиге эки демет чечек багъышладылар ве хатыра ресими чыкъарылды.
Ш. Бельбекли
Фикирлер →
Фикирлеринизи языныз