28 Мар 2009 | Яшлар омюри
Эр йыл Къырым Тасиль ве илим назирлиги мектеплер арасында «Тувгъан тиль энъ къыйметли барлыгъымыз ве онынъ зенгинлиги битмез-тюкенмездир» адлы фестиваль отькере. Март 27 куню Къырым муэндислик-педагогика университетинде бу фестиваль черчивесинде кечкен «Къырым - меним Ватаным» мектеп талебелерининъ иджадий конкурсына екюн чекильди. Мезкюр конкурс онынъ гъаеджиси шаир Юнус Къандымнынъ адыны ташый.
Къырым Тасиль ве илим назирлигине ярымадамызнынъ 22 регионындан 168 иджадий иш кельди. Чокъ языкъ ки, ярышта Кефе, Ялта шеэрлери ве Къурман районы иштирак этмеди. Жюри азалары конкурскъа кельген ишлерни козьден кечирип, I дереджели дипломларнен «Шиириет» номинациясында Багъчасарай районындаки Аджы-Болат (Угловое) умумтасиль мектебининъ 6-нджы сыныф талебеси Нурие Азизованы, Къырым Тасиль ве илим назирлигининъ истидатлы балалар ичюн гимназия-интернатынынъ 8-нджи сыныф талебеси Аметхан Муртазаевни, «Несир» номинациясында Сакътаки 1-нджи умумтасиль мектебининъ 8-нджи сыныф талебеси Альяна Эминованы ве Эрмени-базар (Армянск) шеэриндеки 4-нджи мектепнинъ 10-нджы сыныф талебеси Эльзара Муслядинованы такъдирлемек къарарыны алды.
Ярышнынъ экинджи къысмында алты театр коллективининъ ве алты КВН командасынынъ чыкъышлары бакъылды. Конкурс черчивесинде талебелерге ана тилине севги ашлагъан ве ярышта иштирак этмек ичюн балаларны азырлагъан оджалар да Тасиль ве илим назирлиги тарафындан фахрий ярлыкъларнен мукяфатландылар.
Динара РУМИЕВА
Фикирлер →
Фикирлеринизи языныз